L-2ko lehen autobus elektrikoa ekainean iritsiko da
Jose Antonio Santano Irungo alkatea eta Miguel Angel Paez lehen alkateordea Irizarren egoitzan izan dira gaur goizean. Bertan, L-2 etorkizuneko hiri-autobus elektrikoak muntatzen ari dira.
Horrela, datozen hilabeteetan, 2. lineak azkar kargatzeko zein noiznahi kargatzeko hiru autobus elektriko izango ditu, egungo karga puntuetan berdin-berdin kargatu ahalko direnak –suhiltzaile parkekoa instalatzen bukatzen ari dira–, baita gauez kotxeretan kargatzeko autobus bat. Horrela, Irunbusek egiten dituen bidaien % 90 elektrikoak izango dira. Gaur egun, muntaketa katean daude ibilgailuak, baina, erantsitako argazkian ikus daitekeenez, biniloa jartzen ari zaizkie dagoeneko, hiriko errepideetara ateratzeko prestatzeko.
Laster egingo den beste berrikuntza bat teknologikoa izango da: autobusen barruko ekipamendua berrituko da, Gipuzkoako Garraioaren Lurralde Agintaritzak eta MUGI txartelaren garapenak eskatzen duten azpiegitura instalatuta, eta Irunbusen hamahiru autobusek ticketing euskarri berriak, informazio panel modernoagoak eta dagokion softwarea izango dituzte. Era berean, ekipamendu berriari esker, wifi konexioa izango da autobusetan, eta txartelarekin ordaindu ahalko da.
2. linearako autobus berriak zein autobusen barruko ekipamendua eskuratzeko, Next Generation EU programaren kontura finantzatutako laguntzak eta emisio gutxiko zonen sorrerarako eta hiri barruko garraioaren eraldaketa digital eta jasangarrirako deialdiaren kontura finantzatutakoak erabiliko dira.
Gogoratu behar da IrunBus funtsezko aldaketa-urte batean dagoela, hiriak eta udal honek mugikortasun iraunkorraren alde egiten duten apustuan mugarri berri bat izango den honetan. L-1 % 100 elektrikoa, urtean milioi bat bidaiari baino gehiago mugitzen dituena, 2019an inflexio-puntua izan zen, eta berriro izango da Benta-Zentroa linea laster zirkulazioan jartzen denean, dagoeneko fabrikatzen ari diren 4 ibilgailu elektriko berrirekin. Hori guztia, berrikuntza oso garrantzitsuekin planteatu den kontratu berri baten pean, 5. linea berritik hasi eta trazatu guztietan hobekuntzak egiteraino, teknologia berriekin berritutako ontziratze-talde batetik igaroz.
Aldi berean, Udalbatzak apirilean bozkatuko zuen Irunbus kontratu berriaren helburua Irungo hiri barruko garraio kolektiboko zerbitzu publikoa ematea da; autobusak eta haien barruko ekipamendua izan ezik, zerbitzua emateko beharrezkoak diren elementu guztiak eskuratzea; eta instalazioak, ibilgailuak, karga puntuak eta autobusen barruko ekipamendua kontserbatu eta mantentzea.
Kontratu berria egiteko proposamenaren ezaugarri nagusietako bat linea berri bat (5.a) sortzea da. Linea horrek Elizatxo goialdeari egingo dio zerbitzu, Elatzeta eta Lapitze kaleetan barrena, eta Mendibil ingurura ere sartuko da, Zuberoa kalean eta Nicolás Guerendiáin kalearen goiko aldean geldituta, Ficoba eta Gal alderaino.
Pandemia aurreko kopuruak gaindituta
Irunbuseko bidaiarien kopuruari buruz bildutako azken datuak ikusita, zera ondoriozta daiteke: joan den martxoan, bidaiarien guztizko kopuruaren goranzko joera egonkortu zen –datozen hilabeteotan ikusiko da hazkundea iraunkorra den–, eta, gainera, 2019ko martxoko datuak % 8 hobetu ziren. Alde horretatik, gogoan izan beharra dago Irunbusek 2019an izan zituela bidaiari gehien, pandemia aurreko urtean: urte hartako martxoan, 162.538 bidaia egin ziren Irunbusen autobusetan, Irunbusen historiako hileko bidaia kopuruetan bigarrena –lehenengoa 2019ko urrikoa izan zen, orduan 167.850 bidaia egin baitziren–.