Etxebizitza eta Gizarte Gaietako Saila

316/2002 DEKRETUA, abenduaren 30ekoa, "Etxebizitza Hutsaren Programa" sustatu eta bultzatzen duena, programa horren araubide juridikoa ezartzen duena eta "Vivienda y Suelo de Euskadi S.A./Euskadiko Etxebizitza eta Lurra, SA" (VISESA) Baltzu Publikoari programa kudeatzeko ardura ematen diona.

Gure Autonomia Erkidegoan hainbeste etxebizitza huts edo lagunik gabe daudenez (etxebizitza-parke guztiaren %10,4, azken biurteko inkestaren arabera), beharrezkoa da esku hartze publiko sendo bat, etxebizitza horiek behar dituzten bizikidetzako unitateentzat merkatuan jarri ahal izateko.

Hori dela-eta, 2002ko azaroaren 5eko bilkuran Eusko Jaurlaritzak onartutako (2002-2005) Etxebizitza Bideratzeko Planak, besteak beste, helburutzat hartu du dirauen bitartean 5.000 etxebizitza mobilizatzea eta "Euskadiko Etxebizitza eta Lurra SA" (VISESA) Baltzu Publikoari berariaz eman dio eginkizun hori betetzeko ardura.

Aurreko horri dagokionez, VISESA baltzu publikoaren Estatutuetan (Eusko Jaurlaritzaren 1992ko ekainaren 23ko 175 Dekretuan ezarritakoari betez idatzi ziren estatutuok), besteak beste, helburu hau ezartzen zaio berariaz baltzuari: "ondare sozialarenak diren etxebizitzen kudeaketa egitea errentamendu erregimenpean eta bai edozein eratako zesio-titulupean Baltzuari, errentamendu xedez, atxikitako beste etxebizitza batzuena ere".

Beraz, helburu sozial hori beteko bada, beharrezkoa da programaren ezaugarri nagusiak zehaztea. Bada, zehaztapen hori dekretu honen bidez egingo da, baltzu publikoak legez duen autonomia funtzionala gordeta, jakina.

Ondorioz, Etxebizitza eta Gizarte Gaietako sailburuaren proposamenez, 2002ko abenduaren 30ean Jaurlaritzaren Kontseiluak izandako bilkuran aztertu eta onartu ondoren, hauxe

XEDATU DUT:

1. artikulua.– Helburua eta aplikatzeko esparrua.

Dekretu honen helburua ondokoa da: "Etxebizitza Hutsaren Programaren" araubide juridikoa ezartzea. Programa horren xedea, berriz, hauxe da: Euskal Autonomia Erkidegoan hutsik dauden titularitate pribatuko etxebizitzak alokairurako etxebizitzen merkatuan jartzea, etxebizitzok behar eta babes ofizialeko etxebizitzen berariazko araudiaren arabera onuraduntzat hartuta daudenek eskuratu ahal izateko.

2. artikulua.– Programaren kudeaketa.

(2002-2005) Etxebizitza Bideratzeko Planean ezarritakoari jarraiki, "Etxebizitza Hutsaren Programa" kudeatzea Eusko Jaurlaritzako Etxebizitza eta Gizarte Gaietako Sailari dagokio, "Euskadiko Etxebizitza eta Lurra SA" (VISESA) baltzu publikoaren bitartez.

3. artikulua.– Etxebizitzen gutxieneko baldintzak.

1. "Etxebizitza Hutsaren Programan" sartu eta parte hartzeko, etxebizitzek ondoko baldintzak bete behar dituzte gutxienez:

– Azalera erabilgarriak 120 metro karratu ez gainditzea.

– VISESAk tasatutako merkatu-errentak hileko 660 euro (seiehun eta hirurogei euro) ez gainditzea.

– "Etxebizitza Hutsaren Programan" sartu aurretiko hamabi hilabeteetan errentan edo okupatuta egon ez izana.

– Etxebizitza libre izatea; beraz, ez babes ofizialeko etxebizitza, eta erabiltzeko libre egotea.

2. "Etxebizitza Hutsaren Programan" ez dira sartuko ondoko etxebizitzak: alokatzeko behar besteko eskaria ez dagoen udal edota eskualdeetan daudenak eta bizi ahal izateko funtsezko baldintzak betetzen ez dituztenak –nahiz eta dekretu honetan jasotako eraberritze neurriak erabili– edo, duten ingurua dela-eta, alokatzen zailak direnak.

4. artikulua.– Titularrak etxebizitza lagatzea.

1. Dekretu honen lehenengo artikuluan adierazitako etxebizitza hutsak merkaturatzea honela egingo da: titularrak bere borondatez lagako dio etxebizitza VISESAri, betiere zuzenbideari egokitutako titulu-mota baten bitartez eta inola ere ez bost urte baino epe txikiagoan. Ondoren, baltzu publiko horrek errentamenduan eskainiko du, Dekretu honetan eta Dekretua garatzeko xedapenetan ezarritakoari jarraiki.

2. Egoerak hala egiteko bidea ematen badu, badago beste aukera bat, hain zuzen, VISESAk proposatuta, errentamendua etxebizitza lagatzen duenaren eta onuradunaren artean zuzenean ituntzea, "Etxebizitza Hutsaren Programaren" baldintzak eta onurak izanda.

5. artikulua.– Etxebizitza lagatzearen kontraprestazioa.

Programaren onuradunak izango diren hirugarrenei errentan emateko, eta dekretu hau garatzen duten xedapenetan ezarritako baldintzen arabera, bizilagunik ez duten edota hutsik dauden etxebizitzak baltzu publikoari lagatzen dizkioten pertsonek ondoko onura hauek jasoko dituzte:

– Lagapenak dirauen bitartean etxebizitza bizitzeko moduan dagoela ahalbidetzen duen konponketa edo, bestela, lagatzen duenak zuzenean konponketa egiteko finkatzen den dirulaguntza, betiere etxebizitza bizitzeko moduan uzteko helburuz. Konponketa honen kostuak edo dirulaguntzak ezin izango du inola ere etxebizitzako 18.000 euro (hemezortzi mila euro) gainditu.

– Kanon bat edo aldizkako errenta bat edo, hala egokituz gero, zenbateko kapitalizatu bat. Zenbateko hori merkatuko batez besteko prezioen arabera kalkulatuko da eta ez du inola ere VISESAk tasatutako merkatu-errenta gaindituko. Kaso honetan, egindako birgaitzearen zenbatekoa kontuan hartu ahal izango da.

6. artikulua.– Etxebizitza konpontzeko lanak.

1. Etxebizitza bizitzeko moduan egoteko gutxienezko baldintzak betetzeko etxebizitza hutsean egin beharreko konponketa-lanak hauek baino ez dira izango: aplika dakiekeen araudi teknikoaren arabera, etxebizitzatzat alokatu ahal izateko ezinbestekoak.

2. Lan horiek VISESAk egin behar baditu, baltzu publikoa eratzeko Dekretua aldatzen duen ekainaren 23ko 175/1992 Dekretuaren V.3 idatz-zatian ezarritakoaren arabera egingo dira. Beraz, lehiaketa irekian eta publikotasuna errespetatuta esleituko dira lanok.

7. artikulua.– Ondorengo errentamendua.

1. Etxebizitzak errentan hartzeko "ETXEBIDE" erregistroan berariaz inskribatuta dauden edo inskribatuko diren pertsona fisiko eta bizikidetzako unitateei, beraz, babes ofizialeko etxebizitzen araudiak ezarritako baldintzak betetzen dituzten pertsona fisiko eta bizikidetzako unitateei eskainiko dizkie VISESAk aurreko artikuluetan ezarritakoaren arabera baltzu publikoari lagatako etxebizitzak.

2. "Etxebizitza Hutsaren Programaren" barruan eskuratzeko dauden etxebizitzak errentan eskaini eta esleitzeaz VISESA arduratuko da, betiere ondoko printzipio hauek zorrotz betez:

– Jokabide garbia.

– Objektibotasuna.

– Etxebizitza ahalik eta gehien egokitzea pertsona edo bizikidetzako unitateen beharretara.

3. Edonola ere, "Etxebizitza Hutsaren Programaren" barruan VISESAk egiten duen edozein jarduera egiteko, Euskal Autonomia Erkidegoko Herriogasuntza Nagusiaren antolarauei buruzko Legearen Testu Bategina onartzen duen azaroaren 11ko 1/1997 Legegintza Dekretuaren VI. tituluan eta indarrean dauden gainerako xedapenetan ezarritakoari jarraituko dio.

XEDAPEN GEHIGARRIA

Etxebizitza eta Gizarte Gaietako Sailak eta VISESA baltzu publikoak hitzarmen bat egin eta izenpetuko dute, "Etxebizitza Hutsaren Programaren" kudeaketa finantzatzeko.

AZKEN XEDAPENAK

Lehenengoa.– Etxebizitza eta Gizarte Gaietako sailburuari ahalmena ematen zaio Dekretu hau garatzeko beharrezkoak diren xedapenak emateko.

Bigarrena.– Euskal Herriko Agintaritzaren Aldizkarian argitaratzen den egunean sartuko da indarrean Dekretu hau.

Vitoria-Gasteizen, 2002ko abenduaren 30ean

Lehendakaria,

JUAN JOSÉ IBARRETXE MARKUARTU.

Etxebizitza eta Gizarte Gaietako sailburua,

JAVIER MADRAZO LAVÍN.