Udal Artxiboak, kontserbaziorako politika jarraitu baten bidez egiten die aurre dokumentazioaren narriadura eragiten duten arrazoi posibleei. Instalazio eta altzari egokiak izateaz gainera, Artxiboak beharrezko segurtasun neurriak hartu ditu dokumentazioari begira arrisku-faktoreak izan daitezkeenak kontrolatzeko:

Klima kontrolatzeko tresnak:
Klima kontrolatzeko tresnek aukera ematen dute tenperatura eta hezetasun erlatiboa beti maila berean edukitzeko. Klima-faktore horiek dira dokumentazioa hondatzeko bi arrazoi nagusietakoak. Bat-bateko tenperatura eta hezetasun aldaketek papera uzkurtzea eta dilatatzea eragiten dute eta, ondorioz, papera ahuldu egiten da eta hauskor bihurtu. Sistema honek, pantaila bikoitzeko hormekin batera, aukera ematen dio Artxiboari giroaren gehiegizko hezetasun-mailak eragin litzakeen kalteei (onddoen agerpena, lizuna…) aurrea hartzeko.

Izpi ultramoreak:
Artxiboa behar bezala prestatu da, halaber, dokumentazioa izpi ultramoreetatik babesteko. Horretarako, dokumentuak ez dira inoiz egoten eguzkiaren argitan zuzenean, eguzkiaren argiak papera horitu dezakeelako, tintei indarra kendu eta papera bera hauskor bihurtu.

Suaren kontrako neurriak:
Artxiboa sua sumatzeko sistema automatiko batez eta ate bereziez hornitu da. Gela guztietan eskuzko suitzalgailuak daude, baita sua itzaltzeko gailu automatiko bat ere.

Digitalizazioa:
Kontserbazioa da Artxiboak dokumentazioa digitalizatzeko bideratzen duen prozesuaren helburu nagusietako bat. Dokumentuek, egunero, kanpoko eraso ugari jasaten dute, erabilera bidegabeak, besteak beste. Digitalizazio-prozesuarekin dokumentazioak denboran luzeago irautea lortu nahi da, kendu egiten baita dokumentu horiek zuzenean kontsultatzeko aukera.

Segurtasun neurriak:
Urteetan zehar ebatsiak eta zeharo hondatuak izan dira Artxiboko dokumentu asko. Artxiboaren eraikina lapurreten aurkako sistema batez hornitu da eta, luze gabe, zirkuitu itxiko kamerak instalatuko dira leku estrategiko batzuetan. Horrela, gerta litezkeen erasoak aurreikusi nahi dira, herriaren ondare historiko eta dokumentala arian-arian suntsitu baino ez baitute egiten eraso horiek.

Desinfektatzeko eta intsektuak hiltzeko programak:
Instalazioak sistematikoki eta aldioro garbitzeaz gainera, desinfektatzeko eta intsektuak hiltzeko prozesu batzuk ere burutu dira Artxiboan. Egiteko hauek enpresa espezializatuek bideratzen dituzte eta benetan funtsezkoak dira narriaduraren faktore biologiko nagusiei aurre egin nahi badiegu.

(gora)